ಯೋಚನೆಯ ಬೀಜವದು
ಚಿತ್ತಭಿತ್ತಿಯನು ಸೇರೆ
ಭಾವಪೋಷಣೆಯಲ್ಲಿ
ಭಾವನೆಗಳೆ ಉಸಿರಾಗಿ
ನವರಸಗಳೆ ಮೈಯಾಗಿ
ಸ್ಪಂದನೆಯ ಪುಷ್ಟಿಯಲಿ
ಈ ಕೂಸು ಬೆಳೆಯುವುದು!
ಅತಿ ಸೂಕ್ಷ್ಮ ಈ ಕೂಸು
ಲಹರಿಯಲಿ ನಕ್ಕೀತು
ಅಕ್ಕರೆಯಲಿ ತಬ್ಬೀತು
ರೋಷವನೆ ತೋರೀತು
ಬಂಡಾಯ ಹೂಡೀತು
ದು:ಖದಲಿ ಕನಲೀತು
ಸಾಂತ್ವನವ ಬಯಸೀತು
ಕಾರುಣ್ಯ ಹರಿಸೀತು
ಔದಾರ್ಯ ಮೆರೆದೀತು
ಆಟದಲಿ ಮೈಮರೆತಾಗ
ಆಟಿಕೆಯೊಂದು ಕೈತಪ್ಪಿ
ಮಣ್ಣ ವಾಸನೆಯ ಸೇರಿ
ಸೃಷ್ಟಿಯಲಿ ಲೀನವಾಗುವುದ ಕಾಣುತ್ತ
ಬಿದ್ದುಕೊಳುವುದು ಮತ್ತೆ ಮತ್ತೆ
ಬಲು ಅಶಕ್ತನಂತೆ!
ಸ್ಫುರಣಶಕ್ತಿಯನೀವ
ಭಾವಾಮೃತಕಾಗಿ ಕಾಯುತ್ತ
ನಿರ್ಮಲ ನಗೆಯ ಬೀರುತ್ತ!
-ಸುಮನಾ
