ಬಂದೆಯಲ್ಲ ಓ ಮಳೆರಾಯ
ಮರೆಯದಲೆ ಮಹಾರಾಯ
ವಿರಮಿಸದೆ ಬಲು ಕಾದಿದ್ದೆ
ಈಗಷ್ಟೇ ಬಂದಿರುವೆ
ಬೇಗನೆ ಹೋಗ್ವೆನು ಎಂದೆನಬೇಡ
ತಣಿಸು ನೀ ಈ ಪರಿ-ತಾಪ
ನೀಗುತಲಿ ಉರಿ ಕೋಪ
ಹೋದ್ವರುಷ ಅತಿವೃಷ್ಟಿ
ಮಾಡಿದೆ ಸಂಕಟ ಸೃಷ್ಟಿ
ಅತಿಯಾಗಿತ್ತು ನಿನ್ನ ಪ್ರತಾಪ
ಸೈರಿಸದಾಯ್ತು ಆ ವಿಕೋಪ
ಹುಲಿಪ್ರೀತಿಯ ರೀತಿ
ಆಗಿತ್ತು ನಿನ್ನಯ ರೀತಿ
ಮೃದುವಣಿಸು ಈ ಸಲ ಹೊಡೆತ
ತೋರಿಸುತ ಸಮಚಿತ್ತ
ಮಾಡುತ ಬಾ ಸ್ನೇಹ ಸಿಂಚನ
ಮುಸಲಧಾರೆಯ ಮೃದು ಮಜ್ಜನ
ಒರೆಸುತೆಲ್ಲರ ಕಷ್ಟದ ಕಣ್ಣೀರು
ಚಿಮುಕಿಸು ನೀ ಸಂತಸದ ಪನ್ನೀರು
-ಸುಮನಾ
