ಸ್ವರಭರಿತವು ಪ್ರಕೃತಿಯ ಅಂಕಣ
ಅಸಾಧ್ಯವು ಪೂರ್ಣ ಅರ್ಥಗ್ರಹಣ
ಕ್ಲಿಷ್ಟವು ಧ್ವನಿಗಳ ಪುನರುಚ್ಚರಣ
ಗೂಢವೀ ಭಾಷೆಯ ವ್ಯಾಕರಣ
ಪ್ರಾತಃ ಕಾಲದಿ ಕೇಳ್ವುದು ಅನುದಿನ
‘ಜೀರ್ ಜೀರ್’ ಸ್ವರದ ಅನುರಣನ
ಕ್ರಿಮಿಕೀಟದ ಆರ್ತ ಆಲಾಪನ
ತಿಳಿಯದು ಕಾರಣ;ಅರಿಯದು ಹೂರಣ
ಗಾಳಿಯ ಬೀಸಿಗೆ ಬಗೆಬಗೆ ಕಂಪನ
ಇದ ಬರೀ ‘ಸುಂಯ್’ ಎನೆ ಸರಳೀಕರಣ
ವೇಗಕೆ ಅನುಗುಣ ರವ ಬದಲಾವಣ
ಕಷ್ಟವು ಈ ಪರಿಭಾಷೆಯ ಅನುಕರಣ
ಓಡುವ ನೀರಿನ ತರತರಹದ ನರ್ತನ
‘ಜುಳು ಜುಳು’ ಎಂದರೆ ಅರೆಬರೆ ವರ್ಣನ
ಮಳೆಗಾಲದಿ ಸುರಿವ ಮಳೆಯ ಗಾಯನ
‘ಧೋ ಧೋ’ ಎನಲದು ಅಪರಿಪೂರ್ಣ
ಹಾಡುವ ಹಕ್ಕಿಯ ರಾಗಾಧ್ಯಯನ
‘ಚೀವ್ ಚುವ್’ ಎಂದೆನಿಸುವುದರೆಕ್ಷಣ
ಗಮನಿಸಿ ಆಲಿಸೆ ಪುನಃ:ಪುನಃ:
ತಿಳಿವುದು ಅವಿತಿಹ ಪಲ್ಲವಿ ಚರಣ
ಗ್ರಹಿಕೆಯ ಮಿತಿಯಲಿ ಸ್ವರಗಳ ಮನನ
ದೊರೆವುದು ಮನುಜಗೆ ಪಾರ್ಶ್ವದರ್ಶನ
ಸಹನೆಯ ನಿಕಷದಿ ಸೂಕ್ಷ್ಮ ವಿಚಕ್ಷಣ
ಸಾಕ್ಷಾತ್ಕಾರವು ಲಯ ತಲ್ಲೀನದ ದಿವ್ಯಕ್ಷಣ
