ಬಾಂದಳದಿಂ ಸುರಿದಿದೆ ಸೋನೆಮಳೆ ಧಾರೆ ಜಳಕವಾಡುತ ಕೊಳೆಕಳೆದು ಲಕಲಕಿಸಿದೆ ಧರೆ
ವರುಣ ನೀಡಿದ ಭೂತಾಯ್ಗೆ ಹೊಸಪಚ್ಚೆ ಸೀರೆ
ಸಂಭ್ರಮಿಸಿಹಳು ಅಮ್ಮ ಧರಿಸಿ ಹಸಿರುಡುಗೊರೆ
ನವಪತ್ತಲದ ಮೈತುಂಬ ಪಚ್ಚೆತೆನೆ ಸಿರಿಯು
ನೆರಿಗೆಯಲಿ ಚಿಮ್ಮುತಿದೆ ರಭಸದಿ ನೀರ್ಝರಿಯು
ಬೆಟ್ಟಗುಡ್ಡವು ಅವಳ ಮೃಣ್ಮಯದ ಕಂಚುಕವು
ಹಳ್ಳಕೊಳಗಳೆಲ್ಲ ಅವಳ ಮೆಚ್ಚಿನಾಭರಣಗಳು
ಪಚ್ಚೆ ಸೀರೆಯಂಚಿನ ತುಂಬ ಹೂವ ಪರಿವಾರ
ಹಚ್ಚಿ ಕೆಂಪು ಬಿಳಿ ನೀಲಿ ಹಳದಿ ವರ್ಣ ವಿಸ್ತಾರ
ಅರೆ ಬಿರಿದ ಮೊಗ್ಗು ಕುಸುರಿ ಗೊಂಡೆ ಅಲಂಕಾರ
ಮೂಡುತಿಹ ನವಅಂಕುರ ಹೆಚ್ಚಿಸಿವೆ ಶೃಂಗಾರ
ಮುಸಲಧಾರೆಗೆ ತೊಯ್ದು ಗಿಡಮರ ಬಳ್ಳಿ
ಪಡೆದಿವೆ ಆಶ್ರಯವ ಭೂತಾಯಿ ಸೆರಗಲ್ಲಿ
ಜೀರುಂಡೆಯ ಕೂಗು ಸಂತಸದ ಗದ್ದಲ
ಮಂಡೂಕದ ವಟರು ಅವಳ ಹೆಜ್ಜೆ ಸಪ್ಪಳ
ತೊಯ್ದಷ್ಟು ಮಿರುಗುವ ಹೊಸಪಚ್ಚೆ ಸೀರೆ
ಮಡಿಲಲ್ಲಿ ಒರಗಿ ಮಗುವಾದೆ ಇಂದು ಖರೆ
ಹೊಸ ಸೀರೆಯ ಚೆಂದ ನಾ ಕೆಡಿಸಲಾರೆ
ನಿತ್ಯವಾಗಲಿ ಹಸಿರುಡುಗೆಯು ನಿನಗೆ ವಸುಂಧರೆ
-ಸುಮನಾ
